Yaşımız və təcrübəmizdən asılı olmayaraq başlayacağınız hər yeni iş bizi həyəcanlandırır. Buna görə də həyəcana qapılmadan  haqqınızdakı ilk təəssüratı mükəmməl şəkildə formalaşdırmalısınız. 

İlk iş günündə:

• Gecikməyin. Hətta daha erkən getməyə çalışın. İlk iş günü gecikmə həyəcanını yaşamaqdansa, daha tez getməklə riski aradan qaldıra bilərsiniz. Bunun üçün bir gün əvvəlcədən nəqliyyat alternativlərini, saatı, hətta geyimi belə seçin.
• İmicinizə diqqət edin. Görəcəyiniz iş və işləyəcəyiniz məkana görə geyinməyə diqqət edin. Məsələn, gənclərdən ibarət bir yaradıcı marketinq komandasında işləyəcəksinizsə, ilk iş günü qalstuk taxmamağa üstünlük verin, yaxud dövlət qurumunda işə başlayacaqsınızsa, daha klassik geyinə bilərsiniz. Nə geyinirsinizsə geyinin, ütülü və təmiz olmasına diqqət edin.
• Ünsiyyətə açıq olun. Ünsiyyətdən çəkinməyin, pozitiv olun. Qarşınıza çıxan iş yoldaşlarınızla salamlaşmaqdan çəkinməyin. İlk iş günündə özünüzü onlara təqdim etmək üçün kiçik mətn də hazırlaya bilərsiniz.
• Təvazökar olun. İşə başlar-başlamaz öz uğurlarınız, müvəffəqiyyətləriniz haqqında danışmayın. İnsanlar sizdən sıxıla bilərlər. Davamlı olaraq “mən hər şeyi bilirəm” ab-havasında olsanız, sonrakı gün söhbət edəcək adam tapmaya bilərsiniz.
• Yaxşı bir dinləyici olun. Özünüz üçün bir qeyd dəftəri tutun. Söhbət etdiyiniz insanların sözlərini yaxşı dinləyin, sözünü kəsməyin. İlk günlərdə onlardan dəstək ala biləcəyiniz mövzular ola biləcəyinə görə, soruşduğunuz şeyləri daha yaxşı yadda saxlamaq üçün qeydiyyat aparın.
• Sosial media detoksu edin. İlk iş günü mümkün qədər sosial mediadan istifadəni minimuma salıb işinizə fokuslanın.